අළුත් රහසක්

සිතෙහි සිරගතක හැඟුම් පොදි බැඳ 

අළුත් රහසක් කිය කියා

නෙතෙහි කැල්මන් රඟන රුඟුමන් 

පදබඳිමි හැඩ වය වයා 

රහස් තෙපලූ දෙතොල් පෙති සැලි

තාලයට හැඩ මව මවා

සවන් කිංකිණි නඳට යොමමින්

සොඳුරු බිඟු නද අස අසා 

ලවන් රත් පෙති සීතලෙන් හද

උණුසුමත් සිහිලැල් වෙලා

පියන් නෙතු යුග හදවතින් විඳි

උණුසුමින් සිත නැහැවිලා 

අවසරයි සමු ගන්න

අදයි අන්තිම දවස
හෙට නුඹත් මට නොමැත,
දුකයි සැප දෙක එක්ක
මා එක්ක නිදි වැරුව
නුඹට දැන් අවසරයි
මගෙන් සමු ගෙන යන්න,
උකුල් තලයේ වැතිර
නුඹ එක්ක මම කීව
කවි කතා දැන් නිමයි
හෙටින් පසු නුඹත් නැත.
අහමි බව දැන දැනම 
ලඟට ගත් නිසා නුඹ
හිත කෙලෙස් දම් පුරයි...
එහෙත් සමු ගන්න හෙට....

හෙට මගෙන් සමු ගන්නා මගේ වෙලා හිටිය අන්සතු ලෑපිට.....